عند ستي كم هائل من القصص التي تصلح لملء مجلدات من الكتب لتوثيق تاريخ حيلة عائلة مسيحية فلسطينية و التغييرات التي حصلت في المنطقة خلال القرن الماضي. عندما تبدأ بالحديث, لا تستطع التوقف. لديها اسلوب جميل في السرد, تضيف اليه بعض الفكاهة, وتمييزه بلكنتها الريفية التي حافظت عليها الى اليوم. تتكلم بلغة تجعلك تتعجب للتغييرات التي طرأت على العالم. كأنما عالمها كان و مازال مليء بالسحر و الأرواح و المعجزات, بينما يفتقر عالمي من اي اتصال بعالم الغيب
تعا تكلك كصص الكديسين عشان تتكددس (اقلب ال ك الي ق لفهم المعنى) بدأت ستي بالحديث واصغيت انا
هظا خطرة ابن عم … (قريب للعائلة) موريس اجا يتجوز, و كان عنده بيت فيه صورة اثرية لمريم العدرا, من هاظوك الكديمات, بس مرته ما عجبتها الصورة و ما بدها ايياها في البيت, و عملتله ميت طوشة و شر عشان يشيلها, بس هوه ما ابل. وخطرة يوم كان اهله عاملين عزومة لكرايبهم. بس هي شرانية, و صارت تشطف يومها و ترمي المي عليهم. كانوا ساكنين فوكهم في الطابك الثاني. فا اجا موريس و ميسكها وحدفها من البردنة و طحشها من بيته
خطرة كان في البلد بنتين راهبات كديسات, راحوا حلموا بالعدرا. طلعتلهم بالليل و كالتلهم كوموا كولو لموريس “هظا انا الي طحيت مرته من الدار عشان هي ما بدها اياني فيه” ومن هظاك اليوم ما رجعت للدار, لليوم. كانت كوية! كال مابدها العدرا بالدار كال
تصمت ستي للحظات ثم تتابع في قصة اخرى (هذه اسمعها للمرة 100) و تقول
هظا خطره مرة ختيارة في بيت جالة كانت تصلي في كنيسة مار انكولة و خطرة من التعب راحت نامت. بس صحيت كان الكل مروح ومسكرين الابواب من برة بالمفتاح. هظول الابواب كبار كتير و بدهم اكتر من زلمة تيفتحهم. و هي الحزينة كانت مجهزه العجين عشان تخبز و حاطاه في الطبن (لا اعرف ما هو الطبن) فصارت تبكي و تصلي كدام صورة مار انكوله. يا مارانكوله يا مارانكوله عندي عجين تأخبزه و جوزي و الاولاد بدهم يتغدوا. و فجأه نزل مارانكوله من الصورة و فتحلها الابوب. و راحت تجري هي عند خطرة اخو سيد سيدك شحاده الكطان, هو كان المسؤول عن الكنيسة و بس عنده مفاتيحها. كالتله روح سكر ابواب مار انكوله. اضطلع فيها مستغرب, مالها هظي المجنونة, ما انا لسه هسا امسكرهم! فكالتله الكسة و هيك هيك الي صار. و لما راح يشوف لكا الابواب مفتوحة فصدكها
وتستمر ستي بالحديث من قصة لقصة, تجمع الواقع بالخيال, الماضي بالحاضر بابتسامة و فرح كأنما تعيش تلك الايام من جديد و كأنما اختفى الالم من جسدها الذي انهكه المرض و السنين
Fadi Zaghmout 
Do you have something to say?