سيارات كبيرة مثل هيك تملأ شوارع عمان

امبارح و أنا داخل بسيارتي الفسفوسة (اوبل كورسا) مكة مول في طريقي للنادي الرياضي في المول, كان قدامي سيارة فور ويل كبيرة كثير و بتحمل نمرة عراقية حمرا. عادة لما بادخل كراج المول بوقف عند المدخل للتفتيش الروتيني المضحك, فهو لا يتعدي أن يفتح الزلمة صندوق سيارتي الخلفي و يغلقه حتى من دون ما يتطلع جواته. ما علينا, هادا موضوع تاني, بس شكله الزلمة خاف من حجم السيارة العراقية و قرر انه أصلا ما يحاول يفتح صندوقها. أنا قلت, بركن كمان مرقني من دون ما يفتح صندوق سيارتي خاصة انني كنت متأخر على الحصة, بس كنت غلطان, فهو فتحه و سكره.

المهم, بلحظتها خطر ببالي كم البنزين الهائل اللي بتبلعو هالسيارة, و طبعا خطر ببالي أسعار البنزين و الحديث عن دعمه و العجز في ميزانية الحكومة.. الخ. و أكيد تزكرت أنه هنالك توجه حكومي, من زمان, لاعادة تقييم هذا الدعم لانه أغلبه بروح للناس الغير محتاجه, و فعلا رؤية هاي السيارة العملاقة قدامي اكبر دليل على ذلك. الصحيح اني فكرت أخذ صورة للسيارة و اضيفها للبلوج هادا بس كاميرا تليفوني مو كثير فعاله خاصة من ورى زجاج سيارتي, و كمان ما قدرت أركز و أخذ صورة واضحة و أنا و هي عم نتحرك.

أكيد أنا هون مو ضد ضيوفنا العراقيين أو السياح أو اية جنسية أخرى لوافد على البلد, بس هيك موضوع فعلا مهم انه يتعالج بطريقة صح, والحكومة هلأ خايفة تاخد أي قرار ممكن يتقابل برد فعل عكسي.  دعم البنزين بالطريقة الحالية مكلف علينا كلنا, و فعلا مش مفروض تعطى السيارات الضخمة, بغض النظر عن جنسية مقتنيها, تشجيع في بلد بستورد ٩٦٪ من حاجته من الطاقة, هذا اذا ما ذكرنا الأثر البيئي و حقيقة أنه معظم الوقت يكون سائق هذه السيارات فرد واحد لا أكثر, و كذلك اقتنائها هو جزء من فنطزة اجتماعية اكثر من حاجة شخصية.

أنا بتمنى لو تركز الحكومة على تحسين المواصلات العامة و تحط موضوع الباص السريع في أعلى أولوياتها, بركن اقدرت ابيع سيارتي بدل ما اضطر احط كمان كم من الف دينار عشان اجددها! و بصراحة الازمة صايرة لا تطاق مع انه احنا لسة بالشتا و ما في موسم سياحي هلأ!

يا ريت لو الحكومة تنسى الحراك الشعبي شوي و تركز على المواصلات العامة